Пресс-центр

7 декабря 2020

У гэтыя дні сваё 70-годдзе адзначае адно з найстарэйшых падраздзяленняў Беларускага аўтамабільнага завода – упраўленне галоўнага тэхнолага.

Тэхналагічная служба нашай кампаніі вядзе сваю гісторыю з далёкага 1950 года. Да ўвасаблення ў метале першай уласнай распрацоўкі завадскіх канструктараў – 27-тоннага кар’ернага самазвала БЕЛАЗ-540 – заставалася яшчэ цэлых адзінаццаць гадоў. Гэта былі вельмі складаныя гады зараджэння і станаўлення прадпрыемства, стварэння і развіцця вытворчай базы, распрацоўкі канструкцыі і пастаноўкі на вытворчасць тэхнікі, якая была неабходна разбуранай вайной народнай гаспадарцы. Уласная вытворчая база была вельмі слабай, і ў гэты час нярэдка выратоўвалі кемлівасць, энтузіязм і самаадданасць нашых спецыялістаў. У тых складаных умовах удавалася не толькі ствараць машыны, але і эканоміць рэсурсы, зніжаць працаёмкасць вырабу прадукцыі, захоўваючы і паляпшаючы якасць тэхнікі. Ішлі гады, змянілася не адно пакаленне белазаўцаў. Значны ўклад у развіццё тэхналагічнай службы прадпрыемства ў розныя гады ўнеслі сотні, тысячы спецыялістаў-тэхнолагаў – ад радавых інжынераў да начальнікаў тэхбюро і намеснікаў кіраўніка службы, – якія працавалі самааддана і творча кожны на сваім працоўным месцы. Вопыт, назапашаны ў тыя першыя гады, быў імі беражліва захаваны і шматразова памножаны.

Узяўшы на ўзбраенне тэхналогіі будучыні

Сённяшняе пакаленне тэхнічных спецыялістаў працуе ў новых рэаліях, якія прынцыпова адрозніваюцца ад таго, што было раней. Адно з важных напрамкаў у іх працы на сучасным этапе – стварэнне новых, высокапрадукцыйных магутнасцяў, якія дазволяць выкарыстоўваць машынны час працы абсталявання пры эксплуатацыі ў трохзменным рэжыме. У гэтым выпадку плануецца трэцюю змену выкарыстоўваць без актыўнага ўдзелу чалавека.

Спецыялісты тэхналагічнай службы паспяхова спраўляюцца з задачамі, аб рашэнні якіх раней маглі толькі марыць і да якіх падступаліся дзесяцігоддзямі. Укаранёна тэхналогія фінішнай апрацоўкі шліцавых адтулін пасля загартоўкі, якая дазваляе павысіць дакладнасць вырабу гідрамеханічных перадач і рэдуктараў матор-колаў. Створана два новыя фарбавальны-сушыльныя комплексы з ужываннем 2-К матэрыялаў. Заканчваецца ўкараненне трэцяга, з нанясеннем матэрыялаў па сучасных, інавацыйных тэхналогіях (грунт метадам катафарэзу і 2-х слаёў парашковай эмалі), што дазволіць значна палепшыць знешні выгляд і павялічыць тэрмін службы лакафарбавага пакрыцця кар’ерных самазвалаў. Заканчваецца ўкараненне сілавога стэнда для выпрабаванняў рэдуктараў матор-колаў кар’ерных самазвалаў грузападымальнасцю ад 90 тон і вышэй, што працуе па замкнёным контуры, які дазволіць праводзіць рэсурсныя выпрабаванні аднаго з асноўных вузлоў нашых машын.

За сем дзесяцігоддзяў у плане ўдасканалення тэхналогіі выпуску тэхнікі «БЕЛАЗ» гэтай службай зроблены значныя крокі наперад, але нязменным застаецца адно – імкненне белазаўскіх тэхнолагаў стварыць вытворчасць, якая адпавядае лепшым сусветным машынабудаўнічым брэндам.

Праекты сёння – зачын на заўтра

Працэс мадэрнізацыі станочнага парка асноўнай вытворчасці – задача складаная і патрабуе карпатлівага і вельмі прадуманага падыходу. Таму для замены абсталявання, якое ў свой час дазволіла прадпрыемству павысіць якасць і значна нарасціць аб’ёмы выпуску прадукцыі, але сёння маральна састарэла і не дазваляе забяспечваць прагрэсіўную тэхналогію апрацоўкі, тэхналагічная служба БЕЛАЗа правяла аналіз сусветных тэндэнцый арганізацыі вытворчасці і пабудовы тэхналогіі апрацоўкі карпусных дэталяў і дэталяў тыпу целаў кручэння. Спецыялісты кампаніі спынілі свой выбар на ўкараненні гнуткай вытворчай сістэмы (ГВС), якая складаецца з вертыкальных такарна-фрэзерных і гарызантальна-растачных станкоў, звязаных адзінай сістэмай палетызацыі, сістэмай кіравання, якія ўключаюць склады інструмента, нарыхтовак, брыкеціравальныя прэсы для стружкі, і прыбораў для папярэдняй наладкі прылады па-за станком. Укараненне ГВС дазволіць скараціць час на тэхналагічную падрыхтоўку вытворчасці, пашырыць наменклатуру апрацаваных дэталяў, скараціць колькасць асноўных рабочых і максімальна наблізіцца да ўкаранення бязлюднай тэхналогіі. У 2019 годзе быў праведзены конкурс па закупцы дадзенага комплексу абсталявання. Пераможцам стала кампанія Pietro Carnaghi S.p.А. (Італія), якая з’яўляецца адным з вядучых сусветных лідараў па ўкараненні ГВС на машынабудаўнічых прадпрыемствах. У цяперашні час вядзецца ўзгадненне тэхнічнай і фінансавай частак кантракту.

Тэхнолагі БЕЛАЗа занятыя і ў праектах, якія рэалізуюцца на прадпрыемствах холдынгу «БЕЛАЗ-ХОЛДЫНГ». ААТ «БЕЛАЗ» распрацаваны план-графік рэалізацыі інвестыцыйнага праекта «Арганізацыя на ААТ «Завод ПАК» кольцараскатнай вытворчасці з рэканструкцыяй блока вытворчых цэхаў». Гэта дазволіць забяспечыць атрыманне кольцавых нарыхтовак для ўласнай вытворчасці на кар’ерныя самазвалы «БЕЛАЗ», а таксама забяспечыць рэалізацыю прадукцыі зацікаўленым кампаніям. Улетку 2020 года на конкурснай аснове быў абраны падрадчык – кампанія Danieli S.p.A (Італія). Зараз вядзецца ўзгадненне тэкставай часткi кантракта, яго дадаткаў і прапрацоўваецца канчатковы варыянт доўгатэрміновага фінансавання праекта.

У цяперашні час ААТ «БЕЛАЗ» таксама рэалізуе інвестыцыйны праект «Мадэрнізацыя вытворчасці ААТ «БЕЛАЗ» – кіруючая кампанія холдынгу «БЕЛАЗ-ХОЛДЫНГ» на 2020–2025 гады», накіраваны на мадэрнізацыю дзеючай вытворчасці і засваенне новых тэхналогій для абнаўлення вытворчых магутнасцяў і пашырэння тэхнічных магчымасцяў па вытворчасці кар’ерных самазвалаў, будаўніча-дарожнай тэхнікі і спецтэхнікі, павышэнне канкурэнтаздольнасці прадукцыі. Арыенціровачны кошт дадзенага інвестыцыйнага праекта складае 140 млн еўра. Мяркуецца, што ён закране ўсе тэхналагічныя перадзелы.

У саюзе з навукай

Адно з асноўных напрамкаў дзейнасці любога прадпрыемства, якое разлічвае на поспех у сучасных умовах жорсткай канкурэнцыі і ўсеагульнай цыфравізацыі, – гэта павышэнне якасці ведаў і ўменняў усіх супрацоўнікаў, ад менеджэраў верхняга ўзроўню да працоўнага, які стаяў ля станка. Асабліва актуальна гэта для прадпрыемстваў, арыентаваных на выпуск тэхнічна складаных і навукаёмістых прадуктаў, якімі з’яўляецца тэхніка, што выпускаецца Беларускім аўтамабільным заводам. Сёння не стаіць задача стварыць машыну любой цаной. Спажыўцу патрэбна прадукцыя, якая выпускаецца з мінімальнымі выдаткамі пры вытворчасці, надзейная ў эксплуатацыі, якая не патрабуе складанага абслугоўвання. Стварыць такую тэхніку могуць толькі спецыялісты высокай кваліфікацыі, якія валодаюць навыкамі інжынерных разлікаў, і толькі ў цесным саюзе інжынерных і навуковых кадраў. На БЕЛАЗе для развіцця творчых здольнасцей ёсць усе ўмовы, паколькі ў прадпрыемства даўнія цесныя сувязі з Нацыянальнай акадэміяй навук Беларусі і яе навуковымі ўстановамі: Аб’яднаным інстытутам машынабудавання, дзе створаны і паспяхова працуе навукова-тэхнічны цэнтр «Кар’ерная тэхніка», Фізіка-тэхнічным інстытутам і Інстытутам тэхналогіі металаў, а само прадпрыемства – флагман айчыннага машынабудавання – выдатная пляцоўка для пошуку і распрацоўкі новых тэхнічных рашэнняў і ўвасаблення іх у канкрэтныя справы.

Маладыя спецыялісты, якія з задавальненнем размяркоўваюцца на БЕЛАЗ, маюць добрую тэарэтычную падрыхтоўку і даволі хутка асвойваюцца ў калектыве. На прадпрыемстве патрэбны крэатыўныя, разумныя, маладыя кадры, здольныя працягнуць справу тых, хто стаяў ля вытокаў.