Пресс-центр

4 февраля 2021

Даўняе плённае супрацоўніцтва і сяброўства звязваюць ААТ «БЕЛАЗ» з цэхам тэхналагічнага аўтатранспарту ПАТ «Інгулецкі ГАК» (Група Метінвест, Крывы Рог, Украіна). У першыя дні лютага транспартнікі ІнГАКа святкуюць выдатны і значны юбілей – 60 гадоў з дня заснавання цэха.

1 лютага 1961 года аўтакалона, будучы цэх тэхналагічнага аўтатранспарту ІнГАКа, была размешчана на конным двары АКБ рудаўпраўлення «Інгулец». Праз год цэх перабазіраваўся на новае месца – стаянку аўтамабіляў «Адвод» у горадзе Інгулец, дзе ўжо былі пабудаваныя невялікія рамонтныя майстэрні і сфарміраваныя тры аўтакалоны.

Першую тону жалезнаруднага канцэнтрату Інгулецкі горна-абагачальны камбінат вырабіў у 1965 годзе, і тады ж у цэх тэхналагічнага аўтатранспарту паступілі 15 першых ва Украіне кар'ерных самазвалаў БЕЛАЗ-540. Слаўная гісторыя транспартнага цэха Інгулецкага камбіната і ў далейшым была непарыўна звязана з БЕЛАЗам.

Сёння дасягаць поспеху ў здабычы руды Крыварожскім гарнякам дапамагае сучасная, надзейная і эфектыўная кар'ерная тэхніка «БЕЛАЗ». У 2004 годзе ўпершыню на Украіне на ІнГАКу былі ўведзеныя ў эксплуатацыю кар'ерныя самазвалы БЕЛАЗ-75131 грузападымальнасцю 130 тон. А ў 2014-м адкрылася новая старонка супрацоўніцтва – парк цэха тэхналагічнага аўтатранспарту камбіната папоўнілі першыя 220-тонныя самазвалы БЕЛАЗ-75306.

У цэлым тэхнапарк ІнГАКа ў цяперашні час уключае больш за сотню адзінак кар'ернай тэхнікі «БЕЛАЗ» – гэта самазвалы грузападымальнасцю ад 30 да 220 тон і спецтэхніка.

Адзначым, што менавіта ў парку транспартнікаў Інгулецкага камбіната склалася добрая традыцыя – даваць «БЕЛАЗам» імёны вядомых людзей і іншыя арыгінальныя назвы.

Першы на Украіне 220-тонны «БЕЛАЗ» быў названы ў гонар першага дырэктара ІнГАКа Аляксандра Племяшова.

«Цэх тэхналагічнага аўтатранспарту ПАТ «ІнГАК» і ААТ «БЕЛАЗ» звязваюць даўнія партнёрскія адносіны. Доўгія гады вы з'яўляецеся самымі вернымі і надзейнымі спажыўцамі нашай прадукцыі, штогод парк кар'ерных самазвалаў «БЕЛАЗ» пашыраецца і абнаўляецца новай тэхнікай. Мы высока цэнім нашы дзелавыя адносіны і разам з вамі падзяляем радасць за тыя поспехі, з якімі вы сустракаеце гэтае свята. Спадзяемся, што наша далейшае супрацоўніцтва будзе такім жа плённым, трывалым і ўзаемавыгадным», , – гаворыцца ў віншавальным лісце генеральнага дырэктара ААТ «БЕЛАЗ» Сяргея Нікіфаровіча.

Жадаем калектыву цэха тэхналагічнага аўтатранспарту ІнГАКа захоўваць і памнажаць добрыя традыцыі паспяховай працы. Дабрабыту вам і здароўя. Хай ваш праца будзе плённай і натхнёнай, а новы этап развіцця цэха стане часам росквіту і ўпэўненага руху наперад!