Пресс-центр

18 июня 2020

Клапоцячыся пра сваіх спажыўцоў у іх жаданні рухацца наперад, кампанія «БЕЛАЗ» стварае не толькі надзейную, высакаякасную, эфектыўную і бяспечную кар'ерную тэхніку, але і знаходзіць сучасныя прадуктыўныя рашэнні і новыя зручныя фарматы супрацоўніцтва.

У рамках рэалізацыі кантракта з кампаніяй Coal India Limited на пастаўку ў Індыю 77 кар'ерных самазвалаў БЕЛАЗ-75137 грузападымальнасцю 136 тон і прымаючы пад увагу бягучыя абмежаванні ва ўмовах пандэміі, БЕЛАЗ падрыхтаваў і перадаў індыйскім партнёрам пакрокавую відэаінструкцыю па зборцы тэхнікі, па якой у дадзены час ужо ідзе мантаж белазаўскіх машын.

Дзякуючы ёй індыйскія спецыялісты змогуць прайсці дыстанцыйнае навучанне мантажу, наладцы, комплекснаму тэставанню ўсіх сістэм і ўводу ў эксплуатацыю самазвалаў, што прыбываюць з Беларусі.

Першы ў сваім родзе спецыялізаваны відэагайд па зборцы 136-тоннага самазвала «БЕЛАЗ» дэталёва і грунтоўна дэманструе, як крок за крокам сабраць вялізную кар'ерную машыну. У відэа наглядна адлюстраваны канкрэтныя моманты зборкі і дадзена падрабязная інструкцыя, што, куды і за чым манціруецца, прыкручваецца, якія драты куды далучаюцца, дакладна пазначаны месцы зварачных работ і іншае.

Кожнаму этапу зборачнага працэсу прысвечаны свой сюжэт з характэрным музычным суправаджэннем і тытрамі на англійскай мове. Пры гэтым важна адзначыць, што відэадапаможнік па зборцы абсталяваны неабходнымі спасылкамі на адпаведныя старонкі, чарцяжы і спецыфікацыі друкаванай інструкцыі па мантажы, пуску і рэгуляванні кар'ернага самазвала БЕЛАЗ-75137, якая ўваходзіць у стандартную камплектацыю.

БЕЛАЗ сочыць за тэндэнцыямі сусветнага рынку і ўлічвае пажаданні спажыўцоў, старанна прадумваючы стратэгію прасоўвання сваёй прадукцыі. Кожнаму рэгіёну планеты ўласцівыя свае асаблівасці, таму для кожнага канкрэтнага спажыўца кампанія выпрацоўвае свой асобны варыянт паспяховага ўзаемадзеяння.