Пресс-центр

15 апреля 2021

Сёння, 15 красавіка, у горадзе на Няве генеральны дырэктар ААТ «БЕЛАЗ» Сяргей Нікіфаровіч і рэктар Санкт-Пецярбургскага горнага ўніверсітэта (СПГУ) Уладзімір Літвіненка падпісалі пагадненне аб супрацоўніцтве. Ужо ў верасні ў адной з найбуйнейшых расійскіх ВНУ па горнай справе пачнуць працаваць сучасныя спецыялізаваныя аўдыторыі з эксклюзіўным абсталяваннем.

Інавацыйны Цэнтр кампетэнцый кампаніі «БЕЛАЗ» створаць на прыкладзе лепшых тэхналагічных рашэнняў у машынабудаванні, лічбавых і інфармацыйных тэхналогій у горнай галіне. Гэта ўнікальнае структурнае падраздзяленне падыме на новы ўзровень адукацыйную і навукова-практычную падрыхтоўку студэнтаў СГПУ, а таксама дапаможа павысіць кваліфікацыю спецыялістаў і кіраўнікоў з прадпрыемстваў, дзе эксплуатуецца тэхніка «БЕЛАЗ», якія пройдуць навучанне на базе ўніверсітэта. Тут жа будуць праводзіцца навуковыя даследаванні па прыярытэтных кірунках развіцця горнатэхнічнай галіны. Вынікі гэтай працы паслужаць асновай эфектыўных прапаноў і рэкамендацый у галіне здабычы.

БЕЛАЗ і СПГУ – удзельнікі новага перспектыўнага адукацыйнага праекта – маюць паспяховы вопыт супрацоўніцтва, і кожны са свайго боку валодае вялікім вопытам эксплуатацыі тэхнікі і фундаментальнымі тэхнічнымі ведамі ў горназдабыўной галіне. Гэта магутны творчы тандэм беларускага вытворцы кар'ернай тэхнікі і аўтарытэтнай расійскай ВНУ па горнай справе.

У найстарэйшую тэхнічную ВНУ Расіі прыбудзе па-сапраўднаму эксклюзіўнае абсталяванне, прадастаўленае партнёрамі Беларускага аўтамабільнага завода, – шматлікія стэнды і дынамічны аўтатрэнажор. На базе цэнтра сумеснымі намаганнямі БЕЛАЗа і ГК «Лічба» будуць створаны лабараторыі лічбавай горнай вытворчасці. «Лічба», з'яўляючыся адным з тэхналагічных партнёраў кампаніі «БЕЛАЗ» па рэалізацыі дадзенага праекта, прапануе Горнаму ўніверсітэту працоўнае месца аператара дыстанцыйна пілатуемай і рабатызаванай кар'ернай тэхнікі. У студэнтаў і спецыялістаў горных прадпрыемстваў, якія будуць праходзіць тут курсы павышэння кваліфікацыі, з'явіцца магчымасць непасрэдна з аўдыторыі цэнтра ў рэальным часе кіраваць пагрузачна-даставачнымі рабатызаванымі комплексамі на горных прадпрыемствах і палігоне БЕЛАЗа. Акрамя таго, заняткі на сімулятарах «БЕЛАЗ» дазволяць на практыцы азнаёміцца з работай інтэлектуальных сістэм кантролю эксплуатацыі кар'ернай тэхнікі.

Асаблівасцю цэнтра з'яўляецца выкарыстанне тэхналогій віртуальнай рэальнасці. Пры дапамозе VR-абсталявання можна мадэляваць пазаштатныя сітуацыі, якія часта ўзнавіць у рэальным жыцці альбо небяспечна, альбо занадта дорага. З дапамогай такіх тэхналогій студэнты могуць дэталёва вывучыць не толькі прынцып працы кар'ернай тэхнікі, але і ўбачыць рэальныя ўстройствы без разразных мадэляў або макетаў.

Генеральны дырэктар ААТ «БЕЛАЗ» Сяргей Нікіфаровіч:
«Сёння на горназдабыўных прадпрыемствах запатрабаваныя прафесіяналы, якія валодаюць рэальнымі ведамі пра будову сучаснай тэхнікі, якая ўдзельнічае ў вытворчым працэсе. Пры гэтым трэба разумець, што яна пастаянна ўдасканальваецца, мадэрнізуецца, становіцца больш складанай. І для таго каб павысіць эфектыўнасць яе эксплуатацыі, пазбегнуць памылак, спецыялістам, вядома ж, неабходна атрымліваць новыя веды. Менавіта таму мы хочам стварыць у Пецярбургу пляцоўку, дзе можна было б праводзіць і практычныя заняткі для навучання студэнтаў, і курсы павышэння кваліфікацыі для спажыўцоў нашай прадукцыі. Выбар Горнага ўніверсітэта невыпадковы, гэта наш стратэгічны партнёр, які не толькі рыхтуе кадры для горназдабыўной галіны, але таксама з'яўляецца ініцыятарам укаранення сістэмы прафесійнай атэстацыі інжынераў».

Рэктар Санкт-Пецярбургскага горнага ўніверсітэта Уладзімір Літвіненка:

«Сучасны рынак працы стаў больш патрабавальны ў адносінах да маладых спецыялістаў. У выпускнікоў тэхнічных ВНУ сёння ўжо няма часу на працяглую адаптацыю да вытворчасці, а значыць, універсітэт, калі ён прэтэндуе на статус флагманскага, павінен даць сваім студэнтам магчымасць атрымаць не толькі веды, але і ўсе неабходныя прафесійныя навыкі. Мы павінны пастаянна працаваць над фарміраваннем камфортнага для атрымання ведаў асяроддзя, развіццём матэрыяльнай базы. Гэта адзін з нашых прыярытэтаў».

Адзначым, што ў рамках падпісанай дамовы распрацавана дарожная карта праекта, згодна з якой інавацыйны Цэнтр кампетэнцый кампаніі «БЕЛАЗ» адкрыецца ўжо ў наступным навучальным годзе. Плануецца, што цырымонія ўрачыстага адкрыцця будзе прымеркавана да Дня машынабудаўніка (26 верасня).