Пресс-центр

29 января 2020

Патэнцыял для нарошчвання ўзаемавыгаднага супрацоўніцтва паміж казахстанскімі горназдабываючымі кампаніямі і БЕЛАЗам вялікі, і яго неабходна актыўна выкарыстоўваць. Такое меркаванне выказаў Надзвычайны і Паўнамоцны Пасол Рэспублікі Казахстан у Рэспубліцы Беларусь Аскар Бейсянбаеў, наведваючы 28 студзеня Беларускі аўтамабільны завод.

Падчас сустрэчы спадар пасол і генеральны дырэктар ААТ «БЕЛАЗ» Пётр Пархомчык адзначылі высокі ўзровень гандлёва-эканамічных сувязяў, якія склаліся паміж беларускім прадпрыемствам і партнёрамі з Казахстана. У прыватнасці, БЕЛАЗ мае дамоўленасці аб стратэгічным партнёрстве на доўгую перспектыву з кампаніяй Eurasian Resources Group (ERG), цесныя дзелавыя ўзаемаадносіны звязваюць беларускага вытворцу кар’ернай тэхнікі з ТАА «Богатырь Комир» і іншымі вуглездабывальнымі кампаніямі гэтай краіны. Бакі таксама падкрэслілі неабходнасць далейшага нарошчвання ўзаемавыгаднага супрацоўніцтва ў розных галінах, якія выклікаюць узаемную цікавасць.

Перш чым сесці за стол перамоваў, казахстанскіх дыпламатаў азнаёмілі з вытворчымі магчымасцямі, прадукцыяй і гісторыяй БЕЛАЗа.

Пабываўшы ў цэхах прадпрыемства, госці высока ацанілі маштабы, тэхналагічнасць вытворчасці і якасць беларускай кар’ернай тэхнікі.

«Беларускі аўтамабільны завод з’яўляецца гонарам чалавечай думкі. Жадаю творчых поспехаў, новых грандыёзных праектаў і мноства выпускаў юбілейных «БЕЛАЗаў», – такі запіс у кнізе ганаровых гасцей нашага прадпрыемства пакінуў пасол Казахстана Аскар Бейсянбаеў.

Рэспубліка Казахстан з’яўляецца адным з ключавых стратэгічных партнёраў Беларускага аўтамабільнага завода. У наш час у Казахстане працуе больш за тысячу адзінак кар’ернай і спецыяльнай тэхнікі «БЕЛАЗ». Паводле ацэнкі вучоных, краіна займае 6-е месца ў свеце па запасах прыродных рэсурсаў. Тут разведана больш за 100 вугальных радовішчаў, найбуйнейшымі з якіх з’яўляецца Экібастузскае радовішча, якое адрозніваецца вялікай магутнасцю буравугальных пластоў, і Карагандзінскі вугальны басейн з запасамі звыш 50 мільярдаў тон каксаўных вуглёў.